Zodingliani chuan Vairengte nula chu Bairabi leh Kolasib-ah te truck driver-te leh a remchang a hmuhna hmuna inzuar mai thin a nih thu sawiin, "He thu hi aman min hrilh a, Rs.100 te a hlawh bakah zu duh tawk a in tur a neih thin thute a sawi a ni. Chuvangin, Mumbai-ah chuan an hlawh a that thu ka hrilh a, ani chuan chuta hruai tura min ngen nasat em avangin ka hruai a, kal man pawh pawisa ka tum sak vek a ni," a ti.
Zodingliani chuan Mumbai an thlen thlak hnuah inzawrhna hmun hre chiangtu a thiannu nen an inbiak thu sawiin, "Inzawrhna hmunah hian kan hruai a, an en chian hnuah an duh leh lo a, kan hruai kir leh a ni. Hmun danga hna zawng turin thiam a nei si lo a, ka thian thenkhatte'n thawn haw leh mai rawh ti mah se, pawisa a neih loh bakah kei pawhin pawisa ka neih mai loh avangin, ka thawn haw ta rih lo a ni," a ti.
Hetiang a nih tak avang hian ama duh thu ngeiin zan lamah inzuar tura a chhuah thin thu Zodingliani chuan sawiin, "Zan khat chu a thian Lunglei lama mite nen an va chhuak a, zan reiah rawn hawin an zu rui intibuai nen an thawm a bengchheng khawp mai a, ka thinrimin kut ka thlak a, bang pawh ka tauhtir nghe nghe a ni," a ti a, he mi hnu hian a lungawi lo chu a chhungte hnenah a zualko tak thu a sawi.
Zodingliani chuan he nu awm dan chanchin hi Vairengte MHIP hruaitute pawh a hrilh tih sawiin, "Anni chuan phuar hlawm a, thawn haw mai tur tein min ti a ni," a ti. Mizoram police-in an rawn hruai haw Lunglei mi chu a hruai thlak a nih loh thu sawiin Zodingliani chuan, a thiante'n an tlansan avanga an ina awmtir a nih thu a sawi bawk a ni.
Vanglaini palaiin Vairengte Joint YMA hruaitu a biak chuan, Zodingliani'n a hruai thlak nia an sawi hi a inzuar thin tih chiah chu an hriat loh thu sawiin, "A chang changin kan khuaah a awm a, a pa hi a boral tawh a, a nu chu kan khuaah a awm," an ti.
Zodingliani chu Mumbai lama a awm reng avangin an lo hriat chian loh thu an sawi rualin, Vairengte YMA hruaitute chuan a unaute chu nupui/pasal neia Vairengtea tha taka an awm thu Vanglaini an hrilh bawk.